Яссытугай авылыннан Клара апа Шәйхетдинова бәхетле картлык кичерә

Кеше гомерен тиккә гена табигать фасыллары белән чагыштырмыйлар. Аның да бит бөреләнгән, чәчәк аткан,  таҗын койган мәлләре бар.

Әмма һәр ел фасылының матурлыгы булган кебек, кеше гомеренең дә һәрбер чоры үзгә бер матурлыкка ия. Картлык – шатлык түгел дисәләр дә, битендәге һәр җыерчыгы саен мөлаемлылык, якты нур бөркелеп торган ак яулыклы әбиләрне, ак сакаллы бабайларны күрәсең дә: «Их, шулай матур картаерга насыйп булса иде!» – дип уйлап куясың.

Менә безнең юбилярыбыз да үзенең сиксәненче язын каршы ала. Яссытугай авылында гомер кичерүче Клара апа Шәйхетдинова йортында бүген балалары, онык һәм оныкчыклары, якын туганнары һәм күрше –күләннәр җыелган иде. Күпне кичергән, әмма бүген дә яшәүдән тәм табып, сөенеп, шөкер-ана кылып яшәүче Клара апа өстәлнең нәкъ түрендә иде.

• Ачлык елында интегеп үстек, балам. Бер телем икмәк кабарга тилмергән чаклар еш булды. Әтиебез сугышта, әниебез берсеннән-берсе кечкенә баласын ничек тә булса туйдырырга  дип көне-төне эшләде, - дип бала чактагы хәтирәләрен яңартты юбилярыбыз. Соңрак сугыш тәмамланды, еллар яхшыра төште. Әтиебезнең сугыштан кайтып кереп: “Әнисе, мин кайттым!” – дигән сүзләре әле бүгенге көндә дә колакта яңгырап тора. Без ул вакытта башка бик күп авыл йортларындагы кебек үк  тезелешеп идәндә йоклап ята идек. Әти кайтты дип сөенү-сөенү түгел иде, исән калганына аптырадык, дип әлеге бәхетле мизгелләрне дә искә төшерде Клара апа. Гомер уза торган. Клара апа да Рәис исемле егеткә кияүгә чыга. Ул елларны да юбилярыбыз кызык итеп искә төшерде.

• Язылышырга да бит мине Рәис тарантаска утырып алып китте. Барсак  - ЗАГС районда эшләми булып чыкты. Ул чор Баулы районы белән Ютазы районы кушылган чор булганга күрә, ЗАГС бүлеге дә Баулыга күчкән булган. Аннары берникадәр вакыттан соң Димтамактан барып алдык язылышу таныклыгын, -  дип искә төшерде Клара апа ул чакларны. Берсеннән-берсе матур, тәүфыйклы  балалар тәрбияләп үстерәләр. Гомере буе фермада сыер савучы булып эшәгән Клара Шәһхетдиновага бирелгән рәхмәт хатларының да иге-чиге юк, ул аларны әле бүген дә кадерле ядкарь буларак саклый.

• Апабыз бик игелекле кеше. Үзенең тормыш иптәшенең әнисе белән әтисен тәрбияләп соңгы юлга озатты. Күршеләре белән дә дус-тату яшиләр, - дип җылы сүзләр белән сөйләделәр аның турында. Шушы матур юбилей көнендә Клара апаны тәбрик итәргә килгән социаль яклау бүлеге начальнигы Джанна Волкова, район ветераннар советы әгъзасы Нәкыя Шәрәфиева, Димтамак авыл җирлегенең үз территориясендәге бөтен әби-бабайларга хөрмәт күрсәтеп, аларны һәрберсен юбилйлары белән тәбрик итеп йөрүче җирле ветераннар советы рәисе Ренат Әхмәдишин, авыл җирлеге советы хезмәткәрләре, юбилярның балалары – барысы да Клара апаны 80-яшьлек юбилее белән тәбрик итте. Аңа тыныч тормыш, матур картлык, ныклы сәламәтлек теләделәр.