Ютазы җәмәгатьчеләре Иске карьерны җыештыралар

Бүген Ютазы районы мәгариф бүлеге хезмәткәрләре, район инвалидлар җәмгыяте һәм җәмәгатьчелек белән берлектә, Әбсәләм авылы янында урнашкан иске карьерны җыештыру өмәсенә чыктылар. Бик тиздән җәй җитә, көтеп алынган коену сезоны башлана һәм барысы да табигать кочагына ял итәргә чыгачак. - Кызганычка каршы, без ел саен иске карьер территориясен чүп-чардан арындырырга мәҗбүр. Тырышуларга карамастан, ял итүчеләр чүп-чар капчыкларын, шешәләрне бик күп калдыралар, ә кайберәүләр хәтта өйләреннән төзелеш калдыкларын чыгарырга да оялып  тормыйлар, - дип сөйләде өмә оештырган районның инфраструктура бүлеге начальнигы Вадим Шәрифуллин. - Бүген без өмәгә чыктык, анда инвалидлар җәмгыяте, мәгариф бүлеге хезмәткәрләре җыелды. Ял итүчеләргә мөрәҗәгать итәргә теләр идем. Табигатькә сакчыл караш һәрберебездә булырга тиеш, әгәр һәркем моны үзеннән башласа, бик яхшы булыр иде,- дип билгеләп үтте инвалидлар җәмгыятенең район оешмасы рәисе Дамир Уралов. Исегезгә төшерәбез, өмә республикада 1 апрельдә башланган санитар-экологик икеайлык кысаларында уза.