Ютазы районында язгы чакырылыш уза

Ютазы районында язгы чакырылыш-2020 аерым шартларда узачак. Ул, элеккеге кебек үк, 1 апрельдә башланды. Әмма хәрби частьлар буенча армиягә алынучыларны 2020 елның 20 маеннан да иртәрәк җибәрмиләр. Мондый карарны оборона министры коронавирус пандемиясе аркасында кабул итте. Бу хакта ТР Хәрби комиссариатының Баулы шәһәре, Баулы һәм Ютазы районнары буенча бүлек җитәкчесе Илшат Халитов сөйләде. - Ютазы районы буенча-22 призывник агымдагы елда армиягә китәчәк. Армиягә чакыруны 1 апрельдән башладык, әмма коронавирус пандемиясе белән бәйле рәвештә 12 майга кадәр без читтән торып эшләдек. Беренче озату 23 майга билгеләнгән. Бу көнне безнең районнан барлыгы дүрт егет хезмәткә китәчәк. Алар Киров һәм Саратов өлкәләрендә хезмәт итәрләр дип көтелә, - дип таныштырды комиссияне Илшат Назыйм улы. Хәрби комиссариат начальнигы сүзләренә караганда, чакырылыш һәм җыелма пунктларга контактсыз термометрлар, дезинфекцияләүче лампалар һәм чаралар кайтарылган. Хәрби комиссариатларга аерым бару каралган. Комиссариатларга керү юлында температураны үлчәргә планлаштыралар. Әгәр авыру билгеләре булса яки термометр температура барлыгын күрсәтсә-эчкә кертмиләр. Хәрби комиссариат эчендәге бүлмәләр генә түгел, хәрби хезмәткә чакырылучыларны җыю пунктына илтүче машиналар да дезинфекцияләргә вәгъдә итәләр. Ачык һавада һәм җәмәгать урыннарында, мәсәлән, вокзалларда һәм аэропортларда, шәхси состав саклагыч битлекләрдә торачак. Сүз уңаенда, авиа һәм тимер юл вокзалларын көтү залларында яшь солдатларны мөмкин кадәр башка пассажирлардан аерым урнаштырачаклар. - Мин быел Октябрьский шәһәренең коммуналь-төзелеш техникумын тәмамлыйм. Армиягә үз теләгем белән барам, Ватаныбызның бурычын һәр ир - ат бирергә тиеш дип уйлыйм,-диде Ташкичү авылыннан армиягә алынучы Алмаз Мортазин.