Ютазы районы аграрчылары көнүзәк эшләр турында киңәшмә уздырды

2 июнь 2020 ел., сишәмбе
Шушы көннәрдә “Нәбиуллин” фермер хуҗалыгы базасында агросәнәгать комплексы җитәкчеләре һәм белгечләренең опрератив киңәшмәсе үтте. Алар терлек азыгы туплау, азык өчен базларны әзерләү, кырларда гербицид белән эшләү, чиста парларны эшкәртү һәм, әлбәттә, терлекләрне тәрбияләү турында сөйләште. Чара район башкарма комитеты җитәкчесе Аяз Шафигуллин рәислегендә узды. “Нәбиуллин” фермер хуҗалыгының җәйләвендә җитәкчеләр бозауларны үстерү технологиясенә аеруча зур игътибар бирде. Чараның пленар өлеше көндәлек савым белән бәйле күрсәткечләрдән башланды. Әйтик, чара узган көнне “АгроМир” җәмгыятендә көнлек савым, моннан алдагы елның шушы чорына караганда, 1500 тоннага кимрәк иде. Район җитәкчелеге һәм җирле белгечләр әлеге тискәре күренешнең сәбәпләрен эзләде. Киңәшмәдә, шулай ук, сүз мөгезле эре терлек, аеруча сыерлар санын киметмәү, тәүлеклек артымны арттыру өстендә эшләү, маллар үлеменә юл куймау турында да барды. Район авыл хуҗалыгы һәм азык-төлек идарәсе начальнигы Андрей Борисов хезмәттәшләренең игътибарын печән һәм сенаж хәзерләү технологиясенә җәлеп итте. Ул сусыл азык базларын тәртипкә китерү мөһимлеген дә искәртте. Югарыда әйтелгән көнүзәк эшләрдән тыш, бөртекле культураларны тукландыру һәм химик утау, терлек азыгы культураларының рәт араларын һәм чиста парларны эшкәртү турында да киңәш-табыш коруга багышланган киңәшмәгә чакырып, ике тапкыр телефонограмма бирелүгә карамастан, район чарасын инкяр иткән хезмәт коллективлары да булды. Аграрчыларның дисциплинасын район башкарма комитеты җитәкчесе Аяз Шафигуллин кискен тәнкыйть утына тотта. Илмира ГАЛИЕВА
  Тулырак мәгълүмат: http://yutazy.ru/news/aktual/yutazy-rayony-agrarchylary-knzk-eshlr-turynda-kishm-uzdyrdy 
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International