Ютазы аграрийлары зур сөйләшүгә җыелды
«АгроМир» ҖЧҖ базасында районның авыл хуҗалыгы коллективлары җитәкчеләренең күчмә киңәшмәсе узды.
Аграрийларның зур сөйләшүе эшендә район башлыгы Аяз Шәфигуллин, районның авыл хуҗалыгы һәм азык-төлек идарәсе башлыгы Андрей Борисов, авыл хуҗалыгы производствосы ветераны Сәгадәтулла Төхбәтуллин, Россельхозцетрның җирле бүлекчәсе җитәкчесе Гөлнара Җиһаншина, «АгроМир» ҖЧҖ җитәкчесе Сирин Галиев катнашты. Әлбәттә, алар - район авыл хуҗалыгының нигезе, бу затларның тәҗрибәсе һәм белемнәре бәяләп бетергесез.
Билгеле булганча, «АгроМир» - барлык яктан да нык хуҗалык. Аграрчылар коллективның ындыр табагында һәм көзге бодай чәчү барган басуда булдылар. Район башлыгы орлык материалын алдан инкрустацияләү белән файдалану кирәклегенә басым ясады.
- Чәчкәндә җитәкченең начар орлыклар куллануы хезмәт нәтиҗәләрен, уңышлылыкны зур куркыныч астына куя. Энергетик чыгымнар турында әйтеп тә торасы юк.
Аграрийларның игътибары шулай ук бу көннәрдә көзге чәчүгә керешергә кирәклегенә юнәлтелде.